geh, koal ...
heast, koal ...
i sog da s ...
es fäut mi so au,
dass s ka gerechtichkeit mea gibt!
de reichn wean ollewäu reicha
und de oaman ollewäu äama.
und dazwischn gibt s aa nix mea,
wäu da mittlschtaund aa
ollewäu äama wiad.
da schtoot, de lända, de gemeindn -
olle haum s ka gööd.
oiso wean de schteian
und de obgobm aughom.
owa
in da relaziaun
ollewäu bei de klaanan.
wäu de kennan se net wean.
außa bei de woin.
und do gibt s jo aa
ka echte auswoi ...
***************
schau, koal ...
da sinn von ana vasicharung is dea,
dass ma si a sichaheit schofft!
naa, i wü da do jetzt ka vasicharung vakaufm!
i wü da den sinn davau
aunhaund von da
soziäuvasicharung eaklean:
indem dass ma olle
a soziäuvasicharung zoin,
sichan ma duat de oaweitsplätz
in da vawoitung,
de gaschn fia de baufiaman und
de achitektn von de glospaläst
und de hochn gehöta von de bonzn.
wos tatatn de oaman hund
ohne unsare zohlungan?
de waratn hocknschtaad -
sandla waratns!
wos?
eischpoan soitatns?
nau, des taans do eh!
bei de leistungan!
wos?
bein aufwaund soin s eischpoan?
nau, glaubst, de san deppat?
***************
waaßt, koal ...
i bin draufkumma,
dass s de meistn leit guat geht,
wäu s goa net kneissn,
dass ois schlechta wiad.
nau, is jo woa!
do gibts leit,
de woin da eiredn,
dass seitn euro
des lem büllicha wuan is!
najo -
eigntlich schtimmts scho.
mei lem
is aa büllicha wuan.
wäu - teirare sochn
kaunn i ma jetzt nimma leistn!
owa - waunn des so weida geht,
daunn wiad des lem
echt no büllicha und büllicha -
bis dass s goa nix mea weat is!
***************
waaßt, koal ...
des lem is a pendl,
des wos ollawäu hi- und heaschwingt.
schau -
friara haumma an dreck ghobt.
ka gööd, ka auto, kane haushoitsgeräte,
de wos heit söbstvaschtändlich san,
und aa ka einane wohnung.
daunn haumma ghacklt und gruachlt
wia de deppatn,
damit ma uns wos daschoffm.
heit haumma a bissl wos,
san hoibwegs ausgschtottet,
kennan zfriedn sei.
owa -
waunn des so weida geht,
wia s jetztn ausschaut,
weamma boid wieda
an dreck haumm!
***************
naa, koal ...
i bin ka pessimist!
wäu - es haaßt jo,
a pessimist is a mist
auf dem nix woxt!
owa mia woxn jo de grausbianan,
waunn i mi so umschau
und nochdenk!
owa -
valleicht untascheid't mi
genau des von dia, koal!
***************
waaßt, koal ...
mi fäut des au,
dass de leit
ollawäu so auf de politika
umanaundareitn tan.
de mochn do nix!
ebm, sogn s , des is s jo!
de mochn nix,
dabei gawat s so vü,
wos gmocht ghearat!
nau, und waunn s wos mochn?
daunn is s de leit jo aa net recht!
'schau, wos de scho wieda gmocht haum!'
haaßt s daunn.
'de haumsis scho wiedaramoi gricht,
und fia de freindaln aa!'
nau, owa, koal,
dee mechat i segn, de wos jetztn schrein,
waunn s söwa am ruada waan!
ob se dee net aa söwa
de gustoschtickaln zuweschanzn tätatn,
waunn s de gelegnheit hättatn.
jede sau, de wos am trog is, frisst!
nua wean de hoit,
waunn s gwööt wean,
nochhea gfressn ...
***************
heast, koal,
i sog da 's!
de weiwa san aa nie z'friedn!
mei oide hot mi aukeift,
dass i zweng tua in haushoit!
heast,
i waaß jo goa net, wos de wüü ?!
soi i valleicht ois allaa mochn?
nau bitte,
wea hot 'n de leistn in da kuchl aug'schrauft ?!
i !!!
wea hot in neichn mikrowönhead auspockt
und ia aunhaund dera betriebsaunleitung eakleat ?!?
i !!!
wea tuat de glühbianan auswexln, waunn s' hii san?
aa i !!!
und - in gschiaschpüla ausramma tua i jo aa oft gnua!
owa - se jaummat, ollas muaß sie mochn!
kochn, woschn, begln, z'saummramma ...
wia waunn des a so a aufwaund waa!
hot jo eh fia ollas de neichastn geräte!
nau, fria - do hätt i de dalem woin -
wia ma no ollas ohne de sochn mochn hot miassn!
do hätt s jeian kenna! - woa heitzutog?
nau, und waunn wos hii is?
daunn suag aa ii dafia, dass des repariat wiad,
oda neich augschofft!
owa - ii tua jo zweng, sogt s !!!
dass de weiwa aa nie z'friedn san!
***************
waaßt, koal ...
es gibt toge und schtundn,
do kunntat i de gaunze wööd umoaman!
do find i ollas soo schee,
aa de leit, -
und so freindlich und nett!
owa daunn
is ois wieda gaunz aunaschts,
waunn i wieda niachtan bin ...
***************
du, koal ...
neilich sitz i drunt in tschechal
und filosofia mit a poa so nebbochantn ...
wos?
aso!
oiso: voa a poa tog sitz i - in beisl hoit,
und red mit a poa so augschitte duat
iwa gott und de wööt.
auf amoi kummt a kiwara eine,
vom kowara a hawara ...
wos is?
häää ? des vaschtehst aa net?
maaa ... - kaunnst net deitsch?
oiso: do kummt a polizist eine,
a freind vom wiatn. host mi?
dea woa ziwü duat. ohne unifuam.
und ana von de augschtraatn duat,
oiso a augschwabta, a augsoffana,
voi illuminiat,
dazööt grod wos iwa de gschmiatn ...
?
nau iwa de kiwarei,
iwa de "freind und höfa",
de wos nie do san, waummas braucht.
schtrofzettlschmiarantn hotta s gnennt
und von an bochhendleinsotz hot a dazööt.
do wiad da wochtara in ziwü
drei meta groß und hoch rot
und sogt wos von beleidigung und aumtsehre,
und dass a des auzagn kunntat.
und schteigat se eine und schreit,
ea wü ka schiefes wuat mea hean.
na, sogt eam da aundare,
soi a si hoit de uawaschln zua hoitn!
owa des hot eam aa net passt,
dem vatreta da obrichkeit!
wiara den trankla daunn hot auße haun lossn
von sein freind, in wiatn,
nau, des woa a buschkawüü!
i mechat nua zu gean wissn,
wos dea kiwara vaschtaundn hot von de ausdrick,
de wos eam dea bsuff no um de uan ghaut hot!
kralawatschata aumtsschimmereida woa no des hoamlosaste!
großschädlata schaunddarm und
znepfta tschäsnschnoppa howi aa grod no vaschtaundn ...
oiso - wenigstns sei muadaschprooch hot a kenna, da bsoffane!
***************
no a wengal mundoat ...
mundoat, fia n koal
no wos, koal...
Zur Startseite
Passende LINKS:
No mea mundoat?
Wienerisches & Wörterbuch - HIER!