no wos, koal ...
du, koal,
i vasteh net,
woarum ma sogt,
da mensch isst,
und a viech frisst.
schau di amoi um
in an gosthaus.
schau da de leit au,
bei da füttarung!
do gibt´s vüle,
de fressn äaga
wia a jeds viech!
ajo,
und no wos:
menschn trinkn,
viecha saufm!
nau, i kenn gnua leit,
dewos aa saufm!
menschn gebären,
viecha werfm!
sog,
glaum de leit im eanst,
dass s´ wos bessas san,
ois wia de viecha?
nau, koal,
i
glau des net!
***************
sog amoi, koal,
woast du scho amoi
kinesisch essn?
gö, heast, des is leiwaund!
nau guad,
a lewaknedlsuppm is a lewaknedlsuppm,
und a schnitzl
is a schnitzl ...
owa de antn,
tschop suä,
mit ana frühlingsroin
und an reisschnops
is aa net schlecht.
host scho amoi prowiat,
mit de schtawaln essn, koal?
i?
jo, kloa kaunn i des!
is a klasse eafindung,
des mit de schtawaln!
noch n essn
nimm i de ollewäu mit.
wäu mit de
kummt ma guat
zu de henditastn zuwe!
***************
waaßt, koal,
iagndwia is des komisch.
friara howi de
großötan ausglocht,
wie s ollewäu dazöht haum,
dass in da guadn oidn zeit
ollas vü bessa woa.
owa,
samma se ealich,
heit geht´s uns genau so,
waumma zruckdenkn!
a paradeisa,
des woa nix bsundas fiara.
owa heit warat des a gedicht,
waunn s so schmeckn tatatn,
wia fria!
seit s tomatn haaßn,
haaßn s nix mea,
dafia hoitn s länga.
genauso de katoffen.
wia s no eadopfen ghaaßn haum,
haum s aa no
wia eadopfen gschmeckt!
und aun a bauanbrot von fria,
aun des mecht i scho
goa nimma denkn!
odar aun a
resche kaisasemme!
wäu sunst
kriag i no
haamweh
noch da kindheit!
***************
waaßt, koal,
valleicht bin i
sentimentäu.
nau -
da vagaunganheit vabundn
maan i!
dass i hoit
aun de oitn sochn häng ...
i denk ma oft,
waunn i bein wiatn sitz,
wia s friara woa.
a achtal um fümf schülling,
und a fleischlawal dazua
mit ana kaisasemme.
odar a mauraforön ...
wos?
kaunnst net deitsch?
a knackwuascht hoit!
oda
bein wiaschtlschtandl,
a eitriche,
mit an bugl
und an rochnputza ...
a käsekraina,
mit an brotscheazl
und an kree!
sixtas,
genau des maan i:
deitsch
kaunn heit jo aa
kana mea!
***************
i sog da s, koal,
i bin deprimiat!
nau,
zaummghaut bin i,
geistich owedruckt.
heitzutoch
zöht ka haundschlog mea.
a wuat,
des wos dar ana gibt,
is ka wuat mea.
net amoi,
waunnst a s schriftlich host!
wäu
do wiad s dar aa no vadraht!
heit zöht nua mea
da ööbogn.
jeda denkt nua:
i, i, i, ...
a gruaß,
a freindlichs wuat,
odar a deita
von an autofoahra,
dea wos di iwa de schtrossn winkt,
hot heit scho
sötnheitsweat!
heit
lem s nua mea olle
noch n motto
"jeda is si söwa da nächste!"
iss s do a wunda,
waunnst an schief auschaust,
waunn a da aafoch
de schwaare toschn ohnimmt?
waaßt jo net,
is dea a ausnaum,
oda
geht a da
glei päule damit ?!
***************
paß auf, koal,
wos i da dazöhn woit:
vua a poa toch,
wia s goa so gregnt hot,
do howi mi,
wäu s goa so gwaschlt hot,
und ka wiat in da näh woa,
bein musäum untagschtöt,
bein iwadochtn eigaung.
und, wiar i do so schteh,
siech i a plakatl,
mit ana weabung,
fia de ausschtöllung.
howi ma denkt,
nau wuascht,
zeit host eh,
woast eh scho laung in kan musäum.
und valleicht host a glick,
und es heat boid zum schittn auf.
und bin eine gaunga
in de ausschtöllung.
grins net a so,
ma muaß ja aa amoi wos tuan
fia de kuitua!
heast,
wos de do zaagt haum,
so vüle schene oide schtickln
und büda und woffm und kramuri,
a waunsinn!
is ollas iwa blibm
von de röma
und de aundan leit,
de wos fria glebt haum.
nau,
mi tatat intressian,
wos vo uns,
vo unsra zeit
iwa bleibt.
und wos se de
in a poa 100 joah,
von unsre sochn auschaun wean
in an musäum.
wos?
jo!
hot eh nimma gregnt,
wiar i ausse kumma bin.
***************
waaßt, koal,
i wü mi jo net aufregn.
dafia san ma
meine neavm z schod.
iwa wos?
iwa wos, frogt a!
nau,
do gawat s gnua,
iwa wos i mi aufregn kunntat!
nimm amoi s göd,
zum beischpü.
ollas
wiad ollewäu teira!
de lemsmittln, zum beischpü,
da zins,
de obgobm...
i wü goa net weida redn,
i wü mi jo net aufregn!
oda de politika!
wos de fia an sch ...
schamott zaummdrahn!
und dafia kriagn s
imma mea zoit,
und de kriagn trotzdem net gnua!
owa,
i wü mi jo net aufregn!
und de leit!
sochn ausbuagn
und net zruckgem,
gschichtln druckn,
de wos olle net woa san.
und
wo s d net aufpasst,
wiar a haftlmocha,
wiast iwa s happe ghaut,
und iwa n tisch zogn!
owa -
i wü mi jo net aufregn,
iwa de gfrasta!
***************
heast, koal,
woast scho amoi
in intanet?
i scho.
a freind hot ma s zaagt.
da feal, da haatschate,
waaßt eh.
dea hot mi zuwe lossn
auf sein kompjuta,
und hot ma zaagt,
wia s geht.
söafm nennt ma des, koal.
söafm.
naa, net am wossa!
im intanet
sochn auschaun,
des haaßt aa söafm, koal!
do kaumma si
vaschiedane seitn auschaun
und lesn.
zu wos ma des mocht?
nau, infoamazionan hoin!
wos fia wöchane?
nau, olle!
egal, wos d suachst,
in intanet is ollas drin.
nua suachn muass ma s hoit.
najo, de meistn sochn
san net so leicht zum findn ...
owa de nockatn,
dee
howi glei in massn
am büdschiam ghobt!
***************
mundoat, fia n koal
geh, koal...
no a wengal mundoat ...
Zur Startseite
Passende LINKS:
No mea mundoat?
Wienerisches & Wörterbuch - HIER!