mundoat
seawas koal!
seawas koal, wie geht´s da?
mia?
mia geht´s guad!
najo, es geht hoid -
soso - lala ...
i kennta dazöön
dass i hocknschtaad bin.
und ohbrennt bin i aa ...
de oide hot ma in schteckn gem
und de gschroppm woin aa nix wissn vo mia.
an gerichtsteamin howi muagn,
nua hoit ka knedl fian aunwoit.
owa des dazölida jo goanet,
wäu des
intaressiat di
jo eh net!
***************
heast, koal,
neilich bin i
aun an vuamittoch
in a kaffeehaus gaunga.
wos do fia leit woan,
aun an vuamittoch
in den kaffeehaus!
und jetztn frog i di:
haum denn de olle nix zum hackln?
haum denn de olle nix zum tuan ???
waunn aun an vuamittoch
scho so vü leit
in de kaffeeheisa
umanaundahängan,
daunn muass jo
de wiatschoft
in de knia geh !!!
***************
waaßt, koal,
eigentlich bin i froh,
dass i ka politika bin.
ollawäu redn miaßn vua so vü leit,
und ollawäu mit an todeanstn gsicht sochn dazöön,
de wos ma söwa net so recht glaubt...
ollawäu a augst haum,
dass ana kummt und da beweist,
dass d´ duat oda do a linke draht host -
aa, waunnst goanix dafia kaunnst ...
und ollawäu grinsn miaßn,
waunn di ana vareißt in an kabarä,
und di fia an trottl hischtöt !
naa, des kennt i net, koal.
***************
waaßt, koal,
mia foit auf,
dass ollewäu de schrein tan,
de wos nix haum.
de aan woin des göd oschoffm -
wäus kans haum -
de aundan woin kane woffm expoatian -
wäus nix drau vadienan.
de aan woin olle rechte
fia de oaweita,
de aundan sogn,
se pfeifm am luxus.
owa nua
solaungs eam net haum!
waunns a göd haum,
daunn rian sa se net!
daunn is´s aa wuascht,
waunns as duach de
woffmexpoate kriagt haum!
und waunn ana an luxus hot,
daunn wülla den dahoitn,
und scheißt da auf de menschnrechte!
und auf de rechte von de oaweita!
jojo ...
jeda is si hoit söbst da nächste ... !
***************
waaßt, koal,
de neworka hot gsogt,
und de muaß jo wissn,
wäu de hot zwaa söhne;
da ane is noch deitschlaund gaunga,
da aundare is in schwedn.
oiso, de hot gsogt,
dass ma eh no vahötnismäßich büllich lem,
do bei uns!
aa jetzt no,
wo da zins so gaach auffe gaunga is,
wäu des muaß ma schtatistisch segn,
hots gmaant.
nau guad,
ihre buam vadienan jo aa um klassn mea,
ois wiera oaweita do bei uns.
owa
dafia zoins aa mea fira wohnung,
hots gsogt.
nau, owa des is jo in goa kana relaziaun,
howi gsogt.
waunn i in zins weggazoi,
unds gas, und in schtrom,
und s feansehn, und s telefon,
de hendirechnung von de gschroppm,
und de ratn fias auto, fian vabau,
und in kredit,
daunn bleibt jo goa nix mea zum lem !
naa, hots gmaant,
de oide neworka.
i siech des foisch!
des muaß i schtatistisch segn,
hots gmaant.
wia waunn i ma
von da schtatistik
wos ohbeißn kennt !
***************
waaßt, wos kunst is, koal ?
nau, i wea da des schüdan.
kunst is,
waunn se ana hischtön traut,
vua de leit,
obwoia söwa ka auhnung hot,
wos kunst is,
und se trotzdem traut,
vua de leit
an koal owereißn!
nau, nau, koal!
woa jo net so gmaant!
***************
WEANA HAMUA - Wiener Mundart, Lieder und Musik!
no wos, koal...
geh, koal...
no a wengal mundoat ...
Zur Startseite
Passende LINKS:
No mea mundoat?
Wienerisches & Wörterbuch - HIER!