no a wengal mundoat ...
aundare sochn ...
mei wean ...
egal, wos d aundan oft a sogn,
ob s di lobn tan, oda owetrogn,
aans sog i da aus voin heazn:
ois auf da wöt kennt i vaschmeazn,
ois,
nua net di,
mei wean!
***************
wos is scho b´sundas ...
wos is scho b´sundas
aun da mundoat?
is´s net eh wuascht,
ob s´ ausschtiabt,
de mundoat?
da dialekt, den wost gleant host,
ois klaan´s kind,
von de ötan,
oda bessa nau, -
auf da schtrossn.
de oidn haum ´s jo eh
vahindan woin, domois,
dass d´ so red´st,
wiar a pücha!
Und - waunnst zuaheast,
wia de gsibeaga redn,
oda de tirola,
di vaschtehst jo eh net!
do warat ´s do eh g´scheida,
waunn olle desöwe schproch
redn tätatn!
und am bestn glei
a univeasal-schproch,
fia de gaunze wöd!
do kennt i endlich
bein kinesn
des tschop-suä
in originäu
beschtöön!
***************
da liesi ia gedichtl fia d omi
zu da omi ian gebuatstog
leant de liesi a gedicht,
des sie daunn duat auf da feia
fia de liawe omi schpricht.
owa, wia s so is, bei kinda,
zhaus, do kaunn se s - wundaboa!
owa daunn, vua oi de leit duat:
ois vagessn, eh gaunz kloa!
d liesl druckst und schluckt und schtottat,
faungt daunn goa zum plaazn au,
wäu sa se aun des gedichtl
goa nimma earinnan kau!
d mama wischpat: "sog wos aundas!"
d klaane drauf: "mia foit nix ei!"
d mama: "kaunn jo aa wos audaschts
aus dein lesebiachl sei!"
s madl schluckt, faungt au zum denkn.
daunn wiad s lebhoft mit an moi,
schtööt si wieda hi zua oma,
und gaunz ruhich wiad s in soi!
und d liesi sogt, dass s olle hean:
"du tust mir leid, du altes schwein!"
und daunn, gaunz schtoiz und ohne zögan:
"wirst bald nicht mehr am leben sein!"
de festgäst schaun total vanoglt.
de oma owa druckt des kind.
se waaß, da wüün zöht hoit fia s weak oft!
ob do a freidnzähral rinnt?
***************
de viecha vom safaripark ....
oame hund sans,
de viecha vom safaripark ....
de löwn, giraffn,
de ölefauntn,
de offn und
olle aundan aa.
naujo, gfieadat weans jo -
no ......... -
de viecha vom safaripark ....
nua leida
is ka göd do!
und wos wiad muagn sei???
oame hund sans,
de pflega von
de viecha vom safaripark ....
seit monatn ka göd mea
von da vawoitung
und
muagn valleicht
ka hockn mea ...
wäu leida
is ka göd do!
und wos wiad muagn sei???
oame hund sans,
de besitza von
de viecha vom safaripark ....
von lauta gsindl eineglegt,
und ums göd betrogn,
de leit und s wetta
san schuid
aun da pleitn ...
und leida
is ka göd do!
und wos wiad muagn sei???
oame hund sans,
de des begln miassn, fia
de viecha vom safaripark ....
de politika,
de wos so gean wos mochn tätn,
wäu des jo sooo guat ausschaut,
in da zeidung.
in zeitn wia diesen ...
nua leida
is ka göd do!
und wos wiad muagn sei???
oame hund samma
genauso wia
de viecha vom safaripark ....
wia s aa kummt,
mia wean s peckn.
und iagndana gfreit si
iwa des göd,
des wos vuahea g´föht hot.
und mia wean
trotzdem weida lebn.
nua leida
is ka göd do!
und wos wiad muagn sei???
...
***************
mundoat, fia n koal
Zur Startseite
Passende LINKS:
No mea mundoat?
Wienerisches & Wörterbuch - HIER!